بعد غياب طويل عن الساحه .... هاهو الدكتور مناحي يعود من جديد في الجزء الثالث والاخير من روايته العالميه ...
انا وهايدي ... قصة حب من الادب البيزنطي .... الروايه اللي ماقعدت بالاسواق
لمراجعة الجزء الثاني تجدونه على الرابط
للذهاب للجزء الثاني
__________________________________________________ ________
بعد ما نقلت هايدي من حارتنا ..... وهي داخله بيتهم الجديد
بيتر : قدامي ياقليله الادب ...
هايدي : وشفيك انت ... ماسويت شي
بيتر : ماسويتي شي ... اجل تلعبين مع هالمروح ... هو وش اسمه
هايدي ...> وقلبها ينفطر من جراء ما حدث لي : موناحي
بيتر : من زين الاسم ... من زينه تلعبين معه ...ومسويه له فطور بعد .. وانا اقول البيض ناقص ليه .. وين اودي وجهي من اهل الحاره اللحين ...
هايدي : ليه وجهك وين يبي يروح ........> انواع العباطه
بيتر : لا وتستخفين دمك ....
طرااااااخ طرووووخ طررررررررربخ طاااااااااااااااخ طنبخ طرااااااااااااااخ ...
ودخلت البنيه في حاله غيبوبه لمدة شهرين
.................................................. ......................
صحت من الغيبوبه التي تعرضت لها من جراء ضربات بيتر المركزه في الوجه
هايدي ...> وهي تفتح عينيها : انا وين ...
ام هايدي : انتي في المستشفى يابنيتي
هايدي : وش جابني هنيا ...> صوتها صار فيه خشونه غير معتاده
ام هايدي ...> تمسح دموعها : بعد ماضربكي بيتر اغمى عليك ودخلتي في غيبوبه ..
هايدي ....> وهي تترنح على السرير تحاول الجلوس: انتي من اول شي .. ومنهو بيتر اللي ضربني ... كيف يتجرأ ويضرب زقرت مثلي ؟؟؟
ام هايدي : وشهو بنيتي ... ما تعرفيني ... انا امك وبيتر اخوك ... ووشهو زقرت
هايدي : من صدقك انتي امي ... امي اذكرها ... هي كيف كان شكلها .... ايه تذكرت ... تشبهكي ... صح انتي ماما يعني امي ... بيتر وينه ابي اتوطا في بطنه
ام هايدي : الحمدلله انكي عرفتيني ..
هايدي ..> وهي تقطع حديث امها : ماني بنيتك ... انا ولدكي يا يمه الله يرضا عليك .. ولاتقفلين الاخلاق معي
ام هايدي ...> بصوت متلعثم : ياربي وش صار في البنيه ...
هايدي : الله يهديك انا اللحين ولد ماني بنت ... لا تلحسين مخي
ام هايدي تخرج مسرعه الى الدكتور الذي يشرف على حالة هايدي ... تطلب منه النجده لايجاد تفسير لحالة ابنتها
ام هايدي : دكتور هايدي صحت من الغيبوبه ... و آآآآآ
دكتور هايدي ...> وهو يفرد صدره لقدام ويقاطع ام هايدي : ما ألتلك ياام ها يدي انها غيبوبه بسيطه وراح تصحى بعد يومين
ام هايدي : وقعدنا شهرين ... بس اللحين البنيه صحت ...
دكتور هايدي :بس اهم حاقه صحيت من الغيبوبه ... خلاص حكتب لها علاجات وتبئى تمر علينا بعد شهرين ...
ام هايدي : البنيه اللحين يادكتور استخفت ... تقول انها ولد ... ما ادري وش صار في بنيتي
دكتور هايدي : ايه ... لا مش معئول ... طب يله نروح ليها
وتعود ام هايدي الى غرفة ابنتها ومعها الدكتور وجيش من الممرضات ...
ام هايدي ....> وهي تفتح باب الغرفه : هاذي هي يادكتور ... شوفها بسرعه....آآآآ
انصدمت ام هايدي وهي ترى ابنتها ... هايدي نازعه المغذيات وواقفه في وسط الغرفه ومقطعه شرشف السرير على شكل غتر ولابسته ومشخصه بنت البكار ( شخصية عرابجة قبل) .... وفي يدها سلسله
الدكتور ...> وهو يكلم الممرضات: يله امسكوها وادوها ابره مهدئه بسرررررررعه ...
وينقض جيش الممرضات على هايدي .... في محاوله لتربيطها واعطائها الابره ... حاوطوها من كل جانب ... اقتربت الممرضه الاولى لكي تمسك يدها ... لكن باغتتها هايدي بلكمه بين السامع والدامع ( يعني بوكس على الخد ) ... فتراجع هذا الجيش الى الوراء لكي يلقط انفاسه ... واذا بالدكتور يصيح : امسكوها ... اعملو أي حاقه بس ما تسيبوهاش ...
وينقض هذا الجيش عليها في وقت واحد ... وبما ان الكثره تغلب الشجاعه ... وهايدي توها صحت من الغيبوبه .. وش يبي يصير ... اكيد يبون يريخونها الي تعض الارض ... (تراها ماهي رامبوا تكفخهم كلهم ).... وقد تمكنوا من اعطائها الابره المهدئه ... بعد وقوع كم اصابه في جيش الممرضات ...
بعد الفحص والاشعه المقطعيه التي اخذت لهايدي ... ذهب الدكتور لاخبار عائلتها المفاجئه التي لم تكن في الحسبان ...
الدكتور : بصوا ياقماعه ... احنا امام حاله نادره قدا قدا ..... تحصل في المليار لواحد .... شوفوا ايه اللي حصل ... اسلاك المخ صار فيها خلل ادى الى اندماج المشاعر الانثويه مع الذكوريه
بيتر : يعني كيف يا دكتور ؟؟؟؟
الدكتور : يعني انها بتشعر بعض الاحيان بانها ولد ... مو بنت
ام هايدي : ياويلي على بنيتي ... حسبي الله عليك يابيتر ....
بيتر : قول خير يادكتور ...
الدكتور : هي التقارير اللي بتقول الكلام ده ... مش انا
بيتر : واللحين وش نسوي ..
الدكتور : ما عندنا حاقه نعلمها ... خدوها معاكم للبيت ... يمكن تتحسن ...
بيتر ...> وهو يضع يده على راس امه : طيب يادكتور ... نبي ناخذها ...
.................................................. ................................................
بعد شهر من خروج هايدي من المستشفى .....
هايدي بوسط شارع حارتهم ... لابسه فنيله هلاليه مشققه عليها رقم خمسطعش ( اكيد عارفين منهي فنيلته) ... اعتادوا شباب الحاره عليها بعد ان ذاقوا انواع التمحيط ومسح الوجيه على الزفلت ... واقتنعوا بانها لا تمتلك أي مشاعر انوثه تؤهلها للترقيم او للاستعراض امامها ... بل لتكون قائده لشلتهم لانها مصدر قوه يعتمد عليه ...
هايدي ...> وهي ماسكه سوداني مع علباه : اشوفك مره ثانيه لابس كنادر بدون شرابات ابي احش رجولك ... تضحك علينا تحسبنا ماندري انك ما تلبس شرابات ..... وهي تفكه لحال سبيله ....> تراه نفس السوداني اللي في جانا في الحاره ( راجع الجزء الثاني)
محماس : كفوا يازقرت ... بس امك تناديك ...
هايدي : ياحرمه ادخلي جوا ما عندنا حريم يتهايقون من الدرايش .... ( وانصاعت الام وطست )
اعتذرت هايدي من الزقرت ودخلت بيتهم ...
ام هايدي : يابنيتي ..آآ.. يا ولدي خف على عمرك من هالشوارع ...
هايدي : انا كم مره قلت لك اذا بغيتيني عطيني رنه على الجوال ... لا توهقيني مع الزقرت ...
ام هايدي : المره هاذي ابيك بشي مهم ...
هايدي : بسرعه عندي موعد هجوله ....> تقزز
ام هايدي: متى تعقلين وتخلين هالسوالف عنك ...
هايدي : اللين القى راعي هالفنيله ... مناحي واشوف هو باقي يحبني ... ..
ام هايدي : يحبك بهالشكل ... مالت عليك ...( قطعت قلب هايدي بهالكلام .... وراحت الام )
عزيزي القارئ لاتتعجب من حالتها ... فجأه تقلب بنت وفجأه ولد ... حيرتني وانا اكتب ....> لابوها قصه وابوها روايه
اليوم الثاني ... هايدي مرتزه في وسط شلتها ... وتهايط عليهم ... انواع الصواريخ والتسذب...
حنس : هايدي فيه حاره قريبه ييلها تهجيد ... حنا الذيب المفترس نبي نفرك خشومهم
مزعل : قدااااام ... نروح على رجولنا والا نفشخ سياره ... خلونا نروح على الرجول اسرع ..
هايدي ....> وهي ماسكه قفا مزعل : وراك تهرج قبل عمانك يابزر .... اذا كنا فيه تنكتم ... محماس يا سنايدي جب لنا سياره نبي نروح نهجد هالحاره ونوحدها مع باقي مناطق المملكه ...> تراني قاعد اسوي بحث تاريخي عن السعوديه لاتشرهون علي
محماس : قدااااااااا م ...
وحين دخولهم تلك الحاره المراد تهجيدها ....
هايدي : اتعب يا ناس اذا شفت ورع مسوي كدش ... يفقعون المراره
مزعل : ابي انزل اربيهم كلهم اللحين ( نزل ولم يستمع لباقي كلام هايدي ... وتكفخ الى ان هارت قواه وعاد يجر اذيال التكفيخ)
هايدي : تستاهل .... على بالك انك هايدي ....
محماس : كفوا والله هايدي .....
واستمروا في اعمال الشغب والتخريب حتى وصلوا الى منتصف الحاره المراد تهجيدها .... حيث ان هايدي رات مالا يسرها ... الشوارع مرتبه والاطفال يلعبون شرعد ... والشباب يبلتثون لبعض عن آخر فضايح روبي ...... واذا فجأه قلبها ينقز من صدرها .... لقد رأته ... موناحي .... نعم انه هو .... وقلبها اصبح يشربك ( يعني يخفق ) .. ماذا تفعل الان ....
محماس : شوفوا راعي الددسن ذيك ( يقصدني)... يدي تفركني على ما افرك خشته بالارض ...
هايدي : اهجد انت وياه ... اللي يبي يقرب يمه ابي اخليه اللمبي في فلم كركر ....> تراه فلم سامج مال امه داعي
حنس : على كيفك يا زعيمه ...
وتأمر هايدي شلتها بالانسحاب ... من ارض المعركه لتتلافى مقابلة مناحي ... لا تدري لماذا ... لكن لاتريده ان يراها بهذا المنظر .... واصبحت كلما تراه تفر هي وشلتها ... لاتريد المواجهه معه ... واستمرت معها هذه الحاله ثلاث سنوات ... تتابع فيها اخبار مناحي و شلته وكيف اصبح زعيما لها .....
في ذات يوم وحينما كان مناحي وشلته في قهوة ابو هيثم على طريق الثمامه ... يأخذ جره من الجراك ... اذا بهايدي تدخل هي وشلتها ... قد تغيرت معالم وجهها ... واصبحت ركبها اكثر سوادا من قبل ... وتلبس الان الزبيريات بدل الكعب ... ومشخصه بنت البكار ... وسلسه بيدها ... الحمار اللي يبي يقول انه عرفها ... لكن كانت لابسه الفنيله الهلاليه المشققه وعليها رقم خمس طعش .... فز قلب مناحي .... واخذ يقزقز فيها ... كانه شاك بانه يعرفها ...... جذبت انتباهه
مزعل : هايدي خويك وش رايك نناديه يجلس معنا ...
هايدي : منهو خويي يالبزر ...
مزعل : هذاك اللي مهجدك كل ما تشوفينه تنحاشين ...
اذ بهايدي انتبهت لوجود مناحي ... ماذا تفعل الان ... هل تلوذ بالفرار ... لا فشيله قدام هالعالم ويش يبون يقولون الزقرت اللي بالقهوه .... فكرت وفكرت ... واذ بها تقوم متجه الى الجلسه التي فيها مناحي ...
هايدي : سلااام ازقرت ...
مناحي ...> بنص عين: هلا ...
هايدي : ما القى معكم ولاعه ... لان الشخط خلص وانا ابي ادخن ...
مناحي : لا ما ندخن .. وفارق لاترفس في بطنك اللحين ...
هايدي : طيب ....
نجحت خطتها في ابعاد شكوك مناحي تجاهها ... ولو مؤقتا ...
رجعت هايدي الى شلتها وهي مرتاحه قليلا ....
مزعل : حنس .. عندي نكته جديده
حنس : وشهي ...
مزعل : وشهو وجه الشبه بين نادي النصر وطلاب الابتدائي ...؟؟؟؟
حنس : ما ادري ...
مزعل : كلهم يطلعون بدري يالووح ....
حنس : والله انك صادق هههههههههههههههههههه .............................> مايهاب الحين يبي يطردني من المنتدى
بعد اسبوع على هالسالفه ....
هايدي قد اهتمت قليلا بشكلها ... حتى محماس قام يحبها .... بدأت الاسلاك في مخها تعود تدريجيا ... وبدأت تبتعد قليلا عن شلتها .... لكن تقابلوا الشلتين صدفه اثناء فترة الهجوله في العصر ....
مناحي : وقفوا ياعيال .... كاني اعرفه هالادمي يذكرني بمن ياربي ... بمن بمن ...
مفرح : منهو خلصنا ... نبي نفقع وجهه ووجه شلته ... نبي نشوف الذيب المفترس اللحين من ...
وقام نجر بشد نبيطته استعدادا لبداية القصف ... لكن يد مناحي امتدت بسرعه للنبيطه وامسكا ورماها بعيدا ...
نجر : وش بلاك يا ولد ...
مناحي : اعرفها هاذي ...
نجر: هذا مع انه حلو وعليه ملامح بنيه لكن ... مو لذي الدرجه يامناحي تتهم الرجال بانه بنيه .. عيب عليك
هايدي : مناحي ...
مناحي ...> لا شعوريا :لبيه هايدي ... هاه ايه انتي هايدي وش سوا فيك كذا ...
هايدي : هاذي قصه طويله احكيها لك بعدي ...
وتعانق الحبيبان ... وانصرفا وتركوا شلتهما ...
حنس : وحنا بنقعد كذا
مزعل : جبتهاااااا وش رايكم نتصل بالهيئه ونربيها عشان معاد تطلع مع شباب سودة وجيهنا بين الحارات والحكي كثر علينا .. احنا لازم نزوجها ونفتك
محماس : ما اقدر ما اقدر اتصل على الهيئه واضرها انا احبها
حنس : حبك برص
مزعل : خلاص انا بتصل
مزعل : الوووو ... ياخي انا بغيت اعلمكم ان فيه بنت طالعه مع شاب والعياذ بالله في السياره
حنس : لا يا غبي في هجوله
محماس: لا انت ولا هو اسمها في خلوه محرمه
مزعل : وش دراك انت !؟
محماس: قريتها في كتاب الذئاب البشريه
الشيخ : حسننا يا بني اين هم ذاهبون
مزعل : اقولك في يتمشون
الشيخ : اعلم انهم يتنزهون ولكن اين حدد
مزعل : شباب الرجال قام يحكي انقليزي
حنس : هات هات انا اتفاهم معه
حنس:ياشيخ لازم تمسكونهم
الشيخ : اين هم ذاهبون
حنس : والله ياشيخ مدري لكن ذي شغلتكم مو شغلتي
الشيخ : يا قليل التربيه والتعليم اتتجرأ على الشيخ
حنس : اقول والله انك منسم
الشيخ : حسبنا الله ونعم الوكيل ايها السافل
حنس : ثور انت ثور اقولك طالعين سوا وانت تقول علم الوكيل ورا ما تشغلون الجمس وتدورونهم
الشيخ : اذا لم تغلق السماعه انا الذي سوف اغلقها
حنس : الشرهه على الي يتصل عليكم اصلا .. واغلق الهاتف
مزعل : اآآآآآ..
محماس: انثبر انت ولا عاد تفكر اشوف كله منك
مفرح .> يتدخل : وش رايكم نسوي اللحين شله واصير انا زعيمها ...
محماس : ما تخسي الا انت تصير علي زعيم
مفرح : عاد انت لك ثلاث سنين واطيه على رقبتك حرمه
ودخلو في هوشه ومااتوو جميعا ..... من جراء باص دعسهم وهم في وسط الهوشه وكان على متنه 35 افغاني رايحين الى البطحا
المهم بعد هذه الرومنسيه والقصه الجميله لم اشعر الا والحصاه بين عيوني ....
بيتر : وش تسوي عندك ياقليل الادب ... تهايق على بيتنا ...
مناحي ....> والدماء تسيل على وجهي : كنت اطير الحمام من فوق سطحنا .... آآسف ما اعودها ....
هايدي تناظر فيني وهي تضحك وتقول وش هالخبل ... وانا انزل خوفا على حياتي من وابل الحصى الذي ينهال علي من قبل بيتر ...
لقد نسيت نفسي وانا اتهايق على بيت هايدي ... وااتخيل بأنني اصبحت انا وهايدي حبيبان .... وانا ما الوم بيتر يوم رماني بالحصى لو اني محله كان رميت اللي يهايق على بيتنا با ابو عكفه ( يعني رشاش ).....
انتهتـــ القصه اللي ما قعدت بالاسواق .....
مايستفاد من القصه :
1/ لا تنسون نفسكم يوم تتهايقون على جيرانكم ... عشان ما تنفلقون ...
2/ البنت ما تصير ولد ...
3/ النصر دايم يطلع من الدوري بدري ...
4/ الدخان مضر بالصحه لكن قد يكون اداة تسليه واستعراض ...
5/ مافيه في الدنيا حاجه اسمها اسلاك المخ صار فيها خلل ... كلها تسذب في تسذب
اشوفكم في قصه ثانيه انشالله ...
تحياتي
دكتور مناحي ......
المواضيع المتشابهه
روايه انا وهايدي ..قصة حب من الادب البيزنطي .... الجزء الثالث
العرض العادي
